Агенцијата за аудио и адуиовизуелни медиумски услуги соопшти дека утврдиле дискриминација врз основа на пол и сексизам во кампања која се одвива на три познати радио станици во земјава.
„Деновиве се емитуваат спотови од заедничка кампања во сопствена продукција на Сити Радио, Клуб ФМ и Метрополис Радио Мрежа, која, како што се вели во нив, е наменета за „сите пре-еманципирани жени“.
Агенцијата констатираше дека кампањата претставува дискриминација врз основа на пол, ширење мизогинија и сексизам што е флагрантно кршење на Законот за аудио и аудиовизуелни медиумски услуги. Трите радиодифузери кои ја продуцирале оваа кампања, се однесуваат на начин кој е непоимлив и целосно неспојлив со професионално однесување.
Имено, во кампањата, еманципацијата на жените и на мажите се поставуваат како два процеси кои меѓусебно се исклучуваат, еманципацијата и стремежот на жените да го достигнат максимумот во своите кариери се претставува како негативна појава, успешните жени се подложуваат на потсмев и омраза, а на децата и младите од обата пола им се испраќа порака дека не се еднакви и дека не треба да се стремат кон еднаквост“, се вели во соопштението на АВМУ.
Тие информираат дека до трите радија се упатени известувања за констатираното прекршување на Законот, како и дека Извештајот од надзорот е достапен на веб страницата на Агенцијата, а ќе биде испратен и до Комисијата за заштита од дискриминација.
Според извештајот, дел од пораките во кампањата гласат:
„Ти сакаш да бидеш Марија Кири. Можеби и можеш. Ама не се преценувај ако не можеш. Ти треба Нобелова награда или само пофалница дека си најдобрата?“
„Ѓаволот носи Прада е само филм. Во филмот, Мерил Стрип е само една еманципирана кучка. Се препозна некоја? Кучка може да биде секоја, ама станува само некоја“.
Кампањата предизвика бројни реакции на социјалните мрежи од страна на граѓани и активисти за родови прашања, поради пораките кои ги упатува до жените кои според кампањата биле „премногу еманципирани и станале мажи во трката по работа“.
Реагираа и од Метрополис Радио Мрежата од каде се правдаа дека префиксот ПРЕ од насловот на кампањата, имал намера да посочи дека се што оди во крајност и е претерано е контра-продуктивно и дека „газењето на се пред себе во исто време значи заборавање на етичкото во себе, и сквернавење на архетипското и суштественото кај жената“.
„Им се извинуваме на сите оние кои почувствувале дека Кампањата „Пре-еманципирани жени“ има намера да го навреди или дискриминира идентитетот на жената, нејзината позиција, улога и значење во семејството, во општеството и во некоја од неговите сфери.
Кампањата посочува и на машкиот квази-традиционален модел на супериорен, егоистичен, пасивен маж, со „генетска предиспозиција за доминантност“, кој живее на грбот на жената.
Кампањата, како и сите претходни кампањи кои ги продуцираат овие медиуми, преку симболичен и ироничен јазик, има за цел да ги поттикне вистинските, суштествени егзистенцијални вредности кај единката“, се вели во нивната реакција.
