Платформата за истражувачко новинарство и анализи – ПИНА е организација формирана од новинари, ентузијасти и професионалци, која се залага за промоција и зајакнување на истражувачкото новинарство, медиумската писменост и професионалноста во медиумската средина во Македонија. Освен тоа, ПИНА се залага и за подобрување и унапредување на состојбата на жените новинари во медиумите.
ПИНА основаше и води повеќе новинарски програми како Програмата за жени новинари, Програмата за млади новинари и Програмата за мобилно новинарство и активно работи на обуки и менторски процеси по мобилно новинарство и други медиумски теми. На pina.mk со медиумски содржини (видеа, анализи, стории, интервјуа) придонесуваат учесниците во Програмата за жени новинарки, Програмата за мобилно новинарство како и Програмата за менторска поддршка на млади новинари на ПИНА, како и други новинари со кои ПИНА има соработка.
Програмата за жени новинарки на ПИНА нуди менторства и практична работа во кои новинарките се стекнуваат со иновативни новинарски вештини и работат на значајни граѓански теми. Новинарките поминуваат низ менторски процес и работат на видеа и мултимедијални стории заедно со ментори и потоа сториите се објавуваат на pina.mk. Програмата за жени новинарки третира значајни теми како родовите прашања, човекови права, маргинализирани заедници, медиумска писменост итн. Програмата, исто така има цел да придонесе во развојот на кариерата на новинарките и нивниот пат кон уредничките и други лидерски позиции во медиумите.
Програмата за мобилно новинарство на ПИНА нуди тренинзи, менторски процес и пракса преку учење и практикување на мобилно новинарство и работа на разни новинарски стории преку мобилни видеа. Учесниците во Програмата работат на мобилни видеа кои потоа се објавуваат на pina.mk.
ПИНА ја формираше и Програмата за менторска поддршка на млади новинари преку која работиме на директно менторство и пракса со млади новинари кои работат на текстови и анализи на важни теми во општеството кои потоа се објавуваат на pina.mk.
ПИНА е активен партнер и во други иницијативи кои придонесуваат за едукација на млади новинари и развој на медиумската писменост во земјата.
ПИНА како еден од своите главни продукти во ноември 2017-та го лансираше и Истражувачкиот филмски фестивал – Скопје, неколкудневен медиумски настан кој за прв пат се одржа во Македонија и регионот. Од 2021-ва година, фестивалот се ребрендираше во Медиумски Фестивал Скопје [mfs.mk]. Програмата на фестивалот е поделена во два сегменти, со филмови посветени на истражувачкото новинарство и други медиумски трендови, како и бројни дебати и говорници од Македонија, регионот, Европа и САД кои се фокусираат на разни актуелни теми од областа на новинарството и медиумите.
