На 20 јуни 2026 година, Платформата за истражувачко новинарство и анализи – ПИНА успешно ја реализираше обуката „Медиумска писменост и одговорна употреба на вештачка интелигенција во новинарството“.
Обуката ја водеше Бојан Стојковски, фриленс новинар и главен уредник на IT.mk и неговото регионално издание IT Logs, кој повеќе од една деценија обработува теми од областа на технологијата и бизнисот во земјите од Западен Балкан, како и во Централна и Источна Европа.
Стојковски сподели знаења и практични искуства за примената, придобивките, но и предизвиците што ги носи вештачката интелигенција во редакциите.
Преку интерактивна дискусија и размена на искуства, учесниците разговараа за начините на кои ја користат вештачката интелигенција во својата секојдневна работа, како и за предизвиците со кои се соочуваат при нејзината примена. Посебен акцент беше ставен на препознавањето на содржини генерирани со вештачка интелигенција, проверката на сомнителни објави на социјалните мрежи и во медиумите, како и на важноста од критичко оценување на информациите. Обуката отвори простор и за дискусија за етичката и одговорна употреба на новите технологии, како и за заштитата на новинарите и публиката од потенцијалните ризици и штетни влијанија во дигиталната средина.
Оваа работилница се реализираше во рамките на проектот „Зајакнување на младите новинар(к)и и новинарките за медиумската писменост, одговорната употреба на вештачка интелигенција и новинарството насочено кон решенија“, што го спроведува Платформата за истражувачко новинарство и анализи – ПИНА Скопје.
Проектот е поддржан во рамките на пошироката програма „MedIA-Lit“, предводена од Центарот за граѓанско образование (CCE/CGO) во партнерство со Хелсиншкиот комитет за човекови права во Србија (HCHRS), Хелсиншкиот комитет за човекови права во Северна Македонија (MHC), Центарот за новинарска извонредност во Тирана (TCJE) од Албанија и Атлантската иницијатива (AI) од Босна и Херцеговина, со финансиска поддршка од Европската Унија и кофинансирање од Министерството за регионален инвестициски развој и соработка со невладини организации на Владата на Црна Гора.
