На денешната владина седница донесени се повеќе протоколи за работа во време на ковид-19 кои се однесуваат на различни сектори.
Откако вчера беше соопштено дека Комисијата за заразни болести прифатила предлог-протоколи за одржување на концерти на отворено, на денешната седница на Влада е донесен и протоколот за спроведување на мерки за заштита од ковид-19 при организација на настани, промотори, рентал компании, видео и аудио продукции и техничка поддршка на овие настани.
Концертите ќе се одржуваат под посебни услови, маските ќе бидат задолжителни
„На оваа своја седница Владата ги донесе и протоколот за работа на музеи, галерии и изложбени простори, протоколот за упис на ученици во јавните ученички домови во учебната 2020/2021 година, протоколот за работа на танцовите и балетските клубови, протоколот за вршење на меѓуградски превоз, како и препораки и упатства за спречување на ширење на ковид-19, при влез на македонски и странски државјани во Република Северна Македонија“, информира владината прес-служба.
На денешната 73. седница донесени се измени и дополнувања на протоколот за редовна работа на уплатно-исплатни места на приредувачите на игри на среќа во обложувалница (трета фаза), како и измени и дополнувања на протоколот за работа на угостителските објекти за сместување (хотели и други угостителски објекти за сместување).
Донесена е одлука за престанок на важењето на забраната за одржување спортски натпревари во колективните спортови и е прифатена препораката на Комисијата за заразни болести федерациите да го отпочнат организирањето спортски настани со стриктно почитување на упатствата за натпревари без публика и на другите препораки кои се однесуваат на запазување на здравствената безбедност на играчите и останатите вклучени во натпреварите.
